-Almmuhus-
SMÁVVAOĐĐASATDavvi-Norga: SMS-váruhus­bálvalus guovlluide gos geainnut leat dávjá gitta 

Davvi-Norga: SMS-váruhus­bálvalus guovlluide gos geainnut leat dávjá gitta 

-

-

Stáhta geaidnodoaimmahaga váruhusbálvalus dieđihišgoahtá mátkkálaččaide eanet geainnuid birra davvin gos sáhttá leat ráidovuodjin dahje geaidnu gitta. Stáhta geaidnodoaimmahaga bálvalus gokčá dál geainnuid sihke siseatnamis ja rittus. 

– Jođánis diehtu siivvu birra lea dehálaš johtaleaddjiide vai johtolat manná njuovžilit beassážiid. Danin viiddidat dán bálvalusa, lohká Stáhta geaidnodoaimmahaga geaidnodirektevra  Ingrid Dahl Hovland preassadieđáhusas.

NHO Reiseliv (Ealáhusa váldoorganisašuvdna Mátkeeallimis) lea dieđihan ahte dán jagi lea vuordimis ođđa olahus geat luomustallet Norggas beassážiid. Dáinna Stáhta geaidnodoaimmahaga nuvttabálvalusain sáhttá mátkkálaš tiŋgot sms-váruhusa dain geainnuin mat dávjá leat gitta dálkki dihtii ja oažžut dieđu dalán jus lea ráidovuodjin dahje gitta geaidnu. Dieđáhus muitala maid man guhká dat dilli bistá.

– Mii leat viiddidan dál dán bálvalusa, eat muital dušše mo dálki ja siivu lea badjel duoddara, muhto maid makkár siivu lea rittus. Dál sáhtát oažžut dieđu daid geainnuid birra maid, lohká geaidnodirektevra. 

Neahtas lea maid vejolaš geahččat webkámera bokte mo dilli lea váris justa dalle go geahčat. Vuosttaš oassi dán SMS-bálvalusas almmuhuvvui ovdalgo dálveluopmu álggii. Dalle ledje 20 geainnu Davvi-Norggas mielde ja dál leat 53 geainnu mielde. Stuorámus viiddideapmi lea dahkon Nordlándda ja Tromssa ja Finnmárkku fylkka geainnuid ektui. Dás gávnnat bálvalusa: www.vegvesen.no/fjelloverganger

-Almmuhus-