Bargguhisvuohta Finnmárkkus manná ain buoret guvlui.
Bargguhisvuohta Finnmárkkus manná ain buoret guvlui.
Bargguhisvuohta Finnmárkkus njiejai guovvamánu. 1 155 olbmo leat registrerejuvvon áibbas barggu haga, dat lea 262 unnit go diibmá seamma áiggi.
Bargguhisvuohta fylkkas lea dál 2,9 % bargoveagas. Riikadásis lea bargguhisvuohta 2,5 %.
Eambbo aktivitehta NAV:s
Okta bealli manne dál eai leat šat liikká olu áibbas bargguhis ohccit, lea go NAV:s lea lassánan doaibmaaktivitehta, muitala NAV Finmmárkku veahkkedirektevra Eva-Lill Johansen Margit.
– Lassáneapmi doaibmaaktivitehtas muitala ahte NAV lea dahkan juoidá vai bargoohccit álkibut galget beassat bargui. Dat sáhttet leat doaimmat nu go oahpaheapmi, čuovvoloeapmi NAV bokte, dahje bálkádoarjja, dadjá Margit preassadieđáhusas.
Buorre guolásteapmi dagaha unnit bargguhisvuođa
Bargguhisvuohta lea njiedjan buot ahkejoavkkuin, earret ahkejoavkkus 60-jahkásaččas bajás, doppe lea veahá lassánan.
– Logut čájehit ahte maiddái guolástusgielddain lea bargguhisvuohta njiedjan, nu ahte oassi das lea čadnon dálveguolásteapmái mii lasiha barggahusa, dadjá Margit.
Eanemus ja unnimus
Unnimus bargguhisvuohta Finnmárkkus dál lea Áltás (2,1 %), Kárášjogas fas 2,3 %.
Eanemus bargguhisvuohta lea Várggáin (5,3 %), Guovdageainnus fas 5,2 %.
Sihke Várggáin ja Guovdageainnus lea bargguhisvuohta njiedjan buohtastahtton diimmážiin.
