-Almmuhus-
-Almmuhus-
-Almmuhus-
KULTUVRAAlmmuheapmi maŋiduvvon čakčii

Almmuheapmi maŋiduvvon čakčii

-

-

Dán vahkkoloahpa galggai Piera Balto «Piera juoigá» skearru ođđasit almmuhuvvot CD-hámis, BeskánLuossaRockas. Dál dat lea maŋiduvvon čakčii.

– Ii leat veara bealledagus buktaga almmuhit, nu ahte lea buoremus maŋidit. Dasa hal ii veaje maidege go fabrihka lea meaddán, livččii gal leamaš vuogas dál BeskánLuossaRock oktavuođas almmuhit CD. Muhto eai go son gávdno eará dilálašvuođat goas maiddái heive dán almmuhit, lohká Piera Balto.

 

– Dát CD-almmuheapmi han livččii veahá dego «comebackan» dutnje?

– Danin gal in leat oba jurddašan ge, makkárge comebackan gal. Mun han lean juoigan mánnávuođa rájes ja ii leat nu stuorra rievdadusaid das gal. Muhto dát luođit leat leamaš dušše LP- ja kaseahtta-hámis, eaige dakkárat leat dán áigge olbmuin, ja nu lea digitálahámis vejolaš olahit fas olbmuide dáid luđiiguin, čáibmá Balto.

 

Luođit gárte hiluid háluid

«Piera juoigá» LP-Skearru man Piera Balto almmuhii 1978:s, dat galgá ilbmat CD:an. Piera Balto ja ČálliidLágádus galge almmuhit CD:a dán jagi BeskánLuossaRockas Kárášjogas, lávvardaga, muhto nu ii šatta. Dál lea vuos eahpečielggas goas skearru almmuhuvvo.

– Go deaddiluvvui dat skearru de eai gártan luođit riekta maŋŋálaga, dat leat hiluid háluid eai ge čuovo listtu nu mo lea čállon CD:i. Danne leat mearridan ahte fertet maŋidit almmuheami čakčii, muitala ČálliidLágádusa lágádusdoaimmaheaddji ja CD-buvttadeaddji Amund Johnskareng.

Dán meattáhusa eai fuomášan ovdal ikte, vuollelaš vahkku ovdal go CD galggai almmuhuvvot.

 

Loga maid: Guđe gosa don vuolggášit?

 

– Lei šaddat heahpadin

Buvttadeaddji lei vel árvvoštallan liikká almmuhit skearru lávvardaga, ja lasihit dasa liigelisttu.

– Muhto dat lei šaddat heahpadin. Eat mii sáhte almmuhit skearru ovdal go rivttes buktaga leat ožžon. Moai ledne Pierain (Balto, journ. meark.) leamaš ovttaoaivilis das ahte maŋidat almmuheami.

– Mii diehttelasat šállošat hui sákka dán ovddas, muhto dasa ii veaje maidege. Fabrihkka lea maid šállošan, muhto eai olle ođđasit deaddilit skearru lávvardahkii, ja dál vel lea luopmoáigi danne eai geargga ovdal čakčat dáinna, čilge Johnskareng.

 

Juoiggasta liikká

Vaikke almmuheapmi maŋiduvvo ge de Balto liikká áinnas juoiggasta BeskánLuossaRockas.

– Jo, jo áinnas dagan. Dát doalut han leat min guovllu lágideamit ja de áinnas doarjjun sin ja finadan veahá lávddi alde jus lágideaddjit dan háliidit. Mun han ledjen diibmá maid doppe, ja lohken dalle jo ahte searvvan áinnas fas dán jagi jus háliidit, lohká son.

 

 

 

 

 

 

 

 

 

 

 

-Almmuhus-