Sámediggepresideanta Vibeke Larsen (foto: Åse M.P. Pulk/Sametinget)

– Dál ferte Norga bidjat doibmii julggaštusa

ON álgoálbmotvuoigatvuođaid julggaštusas lea odne 10 jagi ávvudeapmi. Sámediggepresideanta Vibeke Larsen oaivvilda unnán dahkkon Norggas implementeret dahje bidjat doibmii julggaštusa, ja vuordá ahte ráđđehus dál álggaha dan barggu.

09:28 Čakčamánu 13. beaivi 2017

ONa váldočoahkkin dohkkehii čakčamánu 13. beaivvi dán jagi oktasaš álgoálbmotjulggaštusa, maŋŋel badjelaš 20 jagi šiehtadallamiid stáhtaid ja álgoálbmotovddasteddjiid gaskka. Julggaštusas leat sihke dakkár mearrádusat mat gusket vuođđodárbbuide nu mo biepmu, dearvvašvuođa ja oahpahusa dárbui ja das leat dan lassin mearrádusat mat gusket árbevirolaš resurssaid ja eatnamiid geavaheapmái, čállá Norgga Sámediggi preassadieđáhusas.

 

– Ráđđehus ii leat čájehan beroštumi

Norga, sámedikkit ja sámi organisašuvnnat ledje aktiivvalaččat mielde dalle go julggaštus ásahuvvui ja leat maiddái dievasmahttán barggu riikkaidgaskasaččat iešguđetge ON-forumain. Riikkaidgaskasaš arenain lea almmatge unnán bargojuvvon dan ovdii ahte álgoálbmotjulggaštusa iešguđetge mearrádusat heivehuvvojit lágaide ja čuvvojuvvojit hálddašanvuogádagain.

– Suopma, Ruoŧŧa ja Norga eai leat heivehan álgoálbmotjulggaštusa lágaide. Mii oaidnit ahte buot golmma stáhtas leat váilevaš ráđđádallamat sámedikkiiguin. Álgoálbmotjulggaštusa vuođđonjuolggadus friddja ja ovddalgihtii dieđihuvvon miehtama hárrái ii doahttaluvvo, dadjá sámediggepresideanta Vibeke Larsen preassadieđáhusas.

Sámediggi lea áŋgirit ovddidan evttohusaid ja áigumušaid, muitala Larsen.

– Mii leat earret eará árvalan mo mii ovttas sáhtášeimmet ráhkadit doaibmaplána dasa mo julggaštus sáhttá siskkilduvvot lágaide ja mii leat evttohan mo diet bargu sáhtášii čađahuvvot, muhto ráđđehus ii leat atnán beroštumi ovddidit dieid áššiid.

 

Ii ruhta čađahit duohta iešmearrideami

Larsen oaivvilda ahte Sámedikkiin ii ge leat doarvái ruhta nagodit čađahit duohta iešmearrideami min álbmoga ovddas.

– Iešmearrideapmi lea ge okta čiehkageađgi álgoálbmotjulggaštusa huksehusas, ja dalle fertejit álgoálbmogiid ovddasteaddji ásahusat ruhtaduvvot dainna lágiin ahte dat friddja sáhttet mearridit iežaset ekonomalaš, sosiála ja kultuvrralaš ovdáneami, dadjá Larsen.

 

Hástala ráđđehusa

Sámediggepresideanta oaivvilda ahte galgá sáhttit vuordit ahte álgoálbmotjulggaštus, mii lea huksejuvvon seamma vuogi mielde go máŋga eará álbmotrievttálaš reaiddu, berre leat dan meare oahpis ahte ráđđehus aktiivvalaččat bargagoahtá doibmii bidjat julggaštusa.

– Mu hástalus ráđđehussii lea ahte sii čilgejit guđe konkrehta doaimmaid sii jurddašit čađahit vai ON álgoálbmotjulggaštus implementerejuvvo Norggas, dadjá sámediggepresideanta Vibeke Larsen.

Fáddásánit
Ođđasat

På forsiden nå