Stádaministtar lea Davvi-Norgga galledeame ja dovdá optimismma lassáneame. Govven: Jan-Morten Bjørnbakk / NTB scanpix

Doaivu Davvi-Norggain mannat buoret guvlui

Norgga stádaministtar Erna Solberg oaivvilda ahte optimisma lea lassáneame Norgga ekonomiijas, ja davvin orru buoremus jáhkku.

12:12 Miessemánu 19. beaivi 2017
Ođastuvvon: 19.05.2017 - 13:00

– Norgga ekonomiija lea buorráneame, ja Davvi-Norggas manná erenoamáš bures. Bargguhisvuohta njiedjá, ja lassáneapmi lea buoret go muđuid riikkas, muitala stádaministtar NTB:i.

Solberg lea Nordlánddas ja Romssas mátkkis, ja muitala ahte lea čuvges áigi vuordimis oljo- ja gássaossodagas, guolásteamis, mearradoalus ja mátkeealáhusas, ja maiddái dábálaš industriijas.

 

Konkrehta strategiija

Ráđđehusa davviguovllustrategiija veahkeha dan buori lassáneami Davvi-Norggas, oaivvilda stádaministtar.

Son russu Bargiidbellodaga moaitámušain maid Jonas Gahr Støre lea dadjan máŋgii go lea fallehan Solberga go lea unnidan beroštumi davviguovlluin.

– Dat šaddá cuiggodeapmi cuiggodeami dihte, ja leat oahpes ságat Bargiidbellodagas. Mii čađahit davviguovllu ovdáneami konkrehta dásis, ja nannet oahpaheaddjeoahpuid ja fágabargiid, muitala Solberg.

– Suodjalus lea nanneme davviguovllu ja čájeha ahte lea strategalaš dehálaš guovlu dán ráđđehusa praktihkalaš politihkas, lohká son.

 

Fuomášan Davvi-Norgga

Norgga ja Kiinná oktavuohta lea maid buorráneame, mii maid buktá doaivaga davvin, oaivvilda Solberg.

– Dát gullá eanemusat guolásteapmái ja mearradollui, muhto maiddái mátkeealáhussii, lohká son, ja čuoččuha ahte kiinnálaččat leat fuomášan Davvi-Norgga turistaguovlun.

(©NTB)

På forsiden nå