Čájáhusgovva. Govven: Gorm Kallestad / Scanpix

Buoret sáddenáigi ođassáddagis Suomas

Suoma sámit besset illudit go YLE sámegielat tv-ođassáddenáigi rievdá mánnodaga rájes.

15:06 Cuoŋománu 20. beaivi 2017

Yle sámegielat tv-ođassáddagat ožžot ođđa sáddenáiggiid vuossárgga rájes. Seammás sirdásit maiddái davviriikkalaš Ođđasat Yle váldokanálii TV1:žii.

24.4. rájes oidnojit Yle Ođđasat diibmu 16:45 ja davviriikkalaš Ođđasat maŋŋiteahkeda ođassáddagiid oktavuođas, dieđiha YLE Sápmi preassadieđáhusas.

Duorastagaid, go Riikabeivviin lea gažadanboddu, de sáddejuvvo sátta easkka diibmu 16:52.

 

Ollu rievdadeamit

Rievdadus lea Yle kanálaođastusas oassin, man oktavuođas Yle Teema ja Yle Fem sáddagat sirdašuvvaba seamma kanálasadjái. Seammás Yle luohpá ovtta kanálasajis.

Yle Ođđasat leat oassin TV1:ža guhkit ođasollisvuođas, masa gullet maiddái Yle Novosti (ruoššagillii), láhttagielat ođđasat ja guovloođđasat.

Davviriikkalaš Ođđasat fas oidnojit boahtte vahku rájes TV1:žis maŋŋiteahkeda ođđasiid oktavuođas. Sáddenáigi rievddada diibmu 22 ja 23:30 gaskkas. Dássážii Ođđasat leat gilvalan Yle váldoođassáddagiin.

 

– Galgá leat olahanmuttus

Sámegielat bálvalussii ođđa sáddenáiggit mearkkašit buoret vejolašvuođa olahit olbmuid beaivválaččat.

– Sámegielat sisdoalu ii galgga dárbbašit ohcat. Sámeságaid gullan ja oaidnin galgá leat maiddái váldoservodaga olahanmuttus, dan sávvat ollašuvvat buorebut ođastusa mielde, lohká Yle Sámi sadjásaš hoavda Maria Saijets preassadieđáhusas.

Fáddásánit
Ođđasat

På forsiden nå