Ávvir lea humadan njeljiin duojáriin, geat buohkat lohket vuohttán ahte liidnetrenda lea rievdan. Oallugat jearahit čielga ivnniid, nu go aliha, ruoksáda ja ruoná. Govven: Sárá Máret Rávdná Oskal

Pastealla­liinnit eai leat šat trendy

Maŋemuš áiggi leat guvgesivnnat liinnit leamaš hui bivnnuhat, muhto dat lea dál rievdan. Duojárat muitalit Ávvirii makkár liidnetreanda dán jagi lea:

13:47 Ođđajagimánu 11. beaivi 2017
Ođastuvvon: 11.01.2017 - 13:52

Sámi trenddat rievddadit liikká go eará trenddat máilmmis.

Dál álgá oallugiin huššaseamos áigi olles jagis. Čiŋat galget gárvánit, juogo konfirmašuvnnaide, heajaide dahje eará beassášmeassuide.

Gákte- ja čikŋatrenddat leat rievddadan áiggiid mielde. Dán áššis Ávvir geahččá liinniid, ja makkár trenda dál lea.

 

Guvgesruoksat johtán eanemus

Čiŋat rámbuvrra eaiggát Biret Anne Eira, Guovdageainnus, muitala ahte čuvges ivnnit ain johtet, ja bivnnuheamos liinnit leat guvgesruoksadat, sáhppadat ja čuvgesalihat.

Árra skápma son oaččui ođđa liinniid rámbuvrii, 12 iešguđet ivnnis.

– Guvgesrukses liinnit leat johtán buot eanemus, lohká son.

(Ášši joatká gova vuolábealde)


GUVGESRUOKSADAT BIVNNUHAT: Eira čilge ahte leat guvgesrukses liinnit mat johtet eanemus.
Govven: Sárá Máret Rávdná Oskal

Biret Anne Eira tevdne ieš liinniid, ja mearrida ivnniid liinniide. Dan son lea dahkan jahkeviissaid. Son muitala ahte lea dál fas diŋgome ođđa liinniid, ja lea ivnniid válljedeame.

Son muitala soai láveba nieiddainis geahččat ivnniid ja válljedit.

– Lea muhtumat hoahkan ahte galggaše fas dat čielga rukses, alit ja ruoná ivnnit, sámi ivnnit. Jáhkán olbmot dolket daidda guvges ivnniide, lohká Biret Anne.

(Ášši joatká gova vuolábealde)


HÁPME LIINNIID: Biret Anne Eira lea dál hábmeme ođđa liinniid, ja sus leat olu ivnnit main sáhttá válljet.
Govven: Sárá Máret Rávdná Oskal

Sámi ivnnit

Dan lea riessi Johanna Huuva maid vuohttán.

Son lea Ruoŧa beale Sámi duojár, Gironis eret. Juste dál son lea ráhkkaneame Johkamohkemárkaniidda, ja lea doapmamin gárvet nu olu liinniid go olle.

Ávvira journalista jearrá makkár liinniid sus diŋgojit eanemus dál.

– Dál eai šat oba jearat ge guvges liinniid. Olbmot háliidit čielga ivnniid, ja ruoksat lea hui bivnnut, lohká son. Son muitala ahte jus fal diŋgojit čuvges liinniid, de lea dávjá vilges vuođđu, mii heive konfirmántii.

– Dál leat leamaš guvges liinnit hui bivnnuhat máŋga jagi, olbmot soitet dolkan. Lea maid váttis gávdnat liinniid main eai leat guvges ivnnit, go leat dušše dat báhcán. Dat maid muitala ahte olbmot leat dolkan daidda, lohká son.

(Ášši joatká gova vuolábealde)


DUOJÁR: Johanna Huuva lohká vuohttán ahte eatnasat háliidit čielga ivnniid. Dán govas son lea Guovdageainnu duodjemárkaniin.
Vuorkágovva: Sárá Máret Rávdná Oskal

Eai leat dušše ivnnit mat rievddadit, muhto riessanmálle maid. Huuva lohká ahte lea hárve go son fierbmu liinniid.

– Eatnasat háliidit stuora čuolmmaid, ja áinnas sihtet hui suohkadin riessat. Soames soaitá diŋgot liinni mas čuolmmat leat guhkálaga, ja mii lea njárbat, de láven measta hirpmahuvvat, reašká son.

 

Eai diŋgo guvges liinniid

Elsa Labba lea duojár, Áđevuomis Gárasavvonis eret.

Son riessá maid olu diŋgojumiid, ja lohká maid seamma, guvges ivnniid eai báljo šat diŋgo.

– Mun riesan eanemus vilges liinniid, muhto orru nu ahte olbmot háliidit alit, ruoná ja rukses liinniid. Jáhkán guvges ivnnit leat nohkan, dat leat leamaš hui bivnnut maŋemuš jagiid, várra lea mannan badjel dál, lohká son.

(Ášši joatká gova vuolábealde)


RIESSU: Duojár Elsa Labba riessá ja ráhkada ieš liinniid.
Priváhta govva

Son lohká su mielas lea somá heivehit liinniid, ja mearridit makkár málle riessá. Labba lea ieš tevdnen liinniid, ja mearridan ivnniid daidda.

– Oidnen dat mat ovddemus nohke ledje sevdnjes ruoná, čuvges alit ja alit-ruoná liinnit. Soaitá čuovvut gákteivnniid, go sevdnjesruoná lea maid leamaš bivnnuhis gákteivdni, lohká son.

Labba maid lohká seamma go Huuva, diŋgojeaddjit sihtet stuora čuolmmaid.

(Ášši joatká gova vuolábealde)


LIIDNETREANDDAT: Dákkár ivnniid ja riessunmálliid dat eatnašat sihtet dál. Guvges pasteallaid eai jearat šat nu olusat.
Priváhtá govat: Elsa Labba

100-jagi ávvudeapmái háliidit árbevirolaš čiŋaid

Cecilie Danielsen Lifjell doaimmaha Lifjell Bovre duodjegávppi Muoffies.

Son vuovdá juohkelágan duodjeávdnasiid, maiddái liinniid. Son maid lohká guvges ivnniid eai šat diŋgo.

– Jáhkán diimmá skápma dego rievddai, ja olbmot álge jearahit čielga ivnniid, ja hui dávjá rukses liinniid. Dat fal maid čuovvu máilmmi trenddaid, sihke liinnit ja gáktediŋggat, lohká son.

(Ášši joatká gova vuolábealde)


Cecilie Danielsen Lifjell eaiggáduššá Lifjell Bovre gávppi. Govas son lea Guovdageainnu duodjemárkaniin. Vuorkágovva: Sárá Máret Rávdná Oskal

Lifjell muitala ahte lea ođđa liinni tevdnen, ja das lea rukses vuođđu.

Son sávvá liidni lea válmmas ja vuovdemassi Tråante 2017 doaluid rádjái.

– De lea ge hui buorre go ruoksat orru nu bivnnut, lohká giehmánni.

Son dattetge ii jáhke 2017 leat buorren jahkin einnostit makkár trenddat leat. Son jáhkká ahte 100-jagi ávvudeami oktavuođas eatnasat háliidit árbevirolaš čiŋaid, ja soitet danne ollugat jearahit árbevirolaš sámi ivnniid.

– Mun goit lean dál vuohttán go oallugat leat duddjome ávvudoaluide, de ostet eanas árbevirolaš ivnniid, lohká Cecilie Danielsen Lifjell.

Fáddásánit
Magasiidna

På forsiden nå

Vaikke Árja oaččui badjel viđa geardde eambbo jienaid go Guovdageainnu Dáloniidsearvi (GDS), de eai liikká ožžon eambbo áirasiid Sámediggái go GDS ge dagai, namalassii ovtta.

Almmuhuvvon odne, dii. 10:27 Čakčamánu 22. beaivi 2017

Finnmárkku fylkkamánni lea dán jagi maid árvalan Áhkkárvuona bajásšaddanguovddáža Dronnet Sonja skuvlabálkkašumi vuoitit.

Almmuhuvvon odne, dii. 11:08 Čakčamánu 22. beaivi 2017

Politiijat duoguštan mohtorsihkkelvuoddji goartta.

Almmuhuvvon odne, dii. 10:52 Čakčamánu 22. beaivi 2017

Álbmotdearvvašvuođainstituhtta lea ožžon dieđu ahte čiežas leat njommon dan hárves bakteriijaid mii gohčoduvvo Salmonella Typhimurium.

Almmuhuvvon odne, dii. 09:09 Čakčamánu 22. beaivi 2017

Kárášjoga penšunistasearvi lea hirpmástuvvan Marit Mathisdatter Anti áššái gos daddjo ahte su isit šaddá velggolažžan 2700 ruvnno mánnui maŋŋá go buot rehkegat leat mákson. Penšunistasearvvis lea čoahkkin vuossárgga, gos áigot ságastallat ja gávdnat čovdosii mo sáhttet veahkehit boarrásiid Kárášjoga gielddas.

Almmuhuvvon ikte, dii. 15:24 Čakčamánu 21. beaivi 2017

Go ođđa Eurohpágeaidnu gaskal Girkonjárgga ja Murmánskka rahppo boahtte vahkus, de galget guokte bisma buressivdnidit dan geainnu. Davvi álbmogis leat oskumeanut hui nannos, muitala ekspearta.

Almmuhuvvon ikte, dii. 15:30 Čakčamánu 21. beaivi 2017
Álttá, Hámmárfeastta ja Guovdageainnu ássit deaivvadedje Luvddiidčohkas:

Duohta dološ fearánat muita­luvvo várrečohkas Beaskáđđasa Luvddiidčohkas, gos lea várddus nu lulás go Rássegál­várrái ja nu davás go Álttá alimus váriide.

Almmuhuvvon ikte, dii. 11:11 Čakčamánu 21. beaivi 2017

Álbmot čájehii garra vuostemiela bieggamillopárkka huksenplánaide davábealde Rástegáissá Sirpmá álbmotčoahkkimis. Kárášjoga sátnejođiheaddji maiddái lei boahtán bealuštit dan čuođi bargosaji maid ballet massit jus dát bieggamillopárkka ásahuvvo.

Almmuhuvvon ikte, dii. 14:28 Čakčamánu 21. beaivi 2017

Riddu Riđđu Festivála AS lea ožžon vihtta čuoggá go leat rihkkon alkoholaláhkaásahusa dán jagáš festiválas.

Almmuhuvvon ikte, dii. 15:23 Čakčamánu 21. beaivi 2017

Dán áššis gávnnat prognosaid ja makkár áirrasjuohku orru šaddamin. Mii ođasmahttit siiddu dađistaga.

21:15 Čakčamánu 11. beaivi 2017

Romssa suohkanis leamaš dáhpi TV-akšuvdnii addit ovtta ruvnnu juohke suohkanássi nammii, muhto dán jagi leat mearridan lasihit doarjaga ja skeŋket 100.000 ruvnnu.

Almmuhuvvon ikte, dii. 15:02 Čakčamánu 21. beaivi 2017

Meahcceguovddáža ásaheami bargu lávke viidáset vuođđudeami guvlui, ja ohcet ruhtadeami ­guovddážii.

Almmuhuvvon ikte, dii. 11:18 Čakčamánu 21. beaivi 2017

Politiijat leat loahpahan ohcama dán vuoro, go ii leat šat doaivva gávdnat Odd Henry Lahm eallinaga.

Almmuhuvvon ikte, dii. 09:48 Čakčamánu 21. beaivi 2017

Suohkaniid mánáidgárddiin lea eanet jávkan go eará fidnosurggiin. 2016:s lei 12,5 proseantta jávkan, čájehit KS logut.

Almmuhuvvon ikte, dii. 09:58 Čakčamánu 21. beaivi 2017