HERVEME: Ánna-Katri ja Piera Heaika darveheame hearvabátti gaibagahpirii. Govva: Risten Marja Anne Gaup.

«Pimpejit» festivála­hasaid biktasiid

Riddu Riđus lea dán jagi vejolašvuohta hervet boares gávtti dahje eará biktasiid.

19:19 Suoidnemánu 15. beaivi 2017
Ođastuvvon: 17.07.2017 - 09:20

NSR:a nuorat leat ceggen lávu gos sáhttá hervet boares gávtti dahje eará biktasiid, ja leat gohčodan dán doaimma «Pimp my gákti». Go Ávvir bođii NSR:a lávu lusa, de sii álge ođasmahtit Riddu Riđđu-gaibagahpira.
– Mis leat earret eará hearvabáttit, báidnu, liibmamearkkat ja silkebáttit maiguin sáhttá ođasmahttit boares dahje ođđa biktasiid, gávttiid, liinniid dahje gaibagahpiriid, muitala NSR:a nuoraidlávdegotti čálli Piera Heaika Muotka.

 

Leaika álgoálggus
Muotka muitala ahte doaibma lei álggos dušše leaika ovtta čoahkkimis diibmá, muhto sii fuobmájedje ahte lei oalle čaffadis jurdda ja nu sii plánegohte doaimma.
– Doaibma galggai jo leat diibmá, muhto ii oktage astan dalle, dadjá Muotka.

 

Váttis hervet
Muotka muitala ahte bearjadaga fitne veahá olbmot ođasteame biktasiid.
– Fitne dat gal veahá olbmot, muhto lei hui váttis hervet arvvi dihte. Sávvamis bohtet eanet olbmot dál go lea firten, muitala Muotka.

 

Buorre birrasii
Ánna-Katri Helander gii lea NSR:a nuoraidlávdegottis, muitala ahte doaimmas leat máŋga ulbmila.
– Vuosttažettiin lea dat hui somá, lea buorre birrasii, ja olmmoš seastá ruđa maid go ođasmahtte adnon biktasiid, dadjá Helander.

Fáddásánit
Kultuvra

På forsiden nå