GÁVDNAN GUOVŽŽA OAIVVI: Áššis galgá earret eará gávdnon guovžža oaivi ovtta dievddu galbmaskábes. Čájáhusgovva: Per Løchen / NTB scanpix

Viđas dubme­hallan evttolaš ja eavttuhis giddagassii boraspire­áššis

Luleju diggegoddi lea cealkán duomu áššis mas viđas ledje áššáskuhtton go galget goddán gávcci boraspire.

12:56 Skábmamánu 14. beaivi 2017

Vihtta dievddu, gaskal 36- ja 73-jahásaččat, ledje golggotmánu áššáskuhtton Luleju diggegottis, go galget goddán gávcci boraspire.

Eanas dat dáhpáhusat galget dáhpáhuvvan 2016:s.

 

Dubmejuvvon

Diggegoddi lea cealkán duomu. Váldoolmmái áššis, 46-jahkásaš Norbottena boazobargi, dubmejuvvui jagi ja njeallje mánu giddagassii.

Guovttis dubmejuvvuiga giddagassii ja guovttes dubmejuvvuiga eavttuhis giddagassii ja servodatbálvalussii.

Dan dieđiha NRK Romsa.

 

Duomut

Váldoolmmái dubmejuvvui giddagassii go galgá searvan roavva bivdorihkolašvuhtii, roavva bivdorihkolašvuođa dihte ja rihkkon vearjolága.

Váldoolbmá áhčči dubmejuvvui jahkái giddagassii go galgá searvan roavva bivdorihkolašvuhtii, rihkkon vearjolága ja rihkkon ráfehuhtton šlájaid lága.

37-jahkásaš dievdu dubmejuvvui jahkái ja golmma mánnui giddagassii roavva bivdorihkolašvuođa dihte go lea báhčán geatkki ja buvihan guovžža jámas.

Guokte dievddu leaba dubmejuvvon eavttuhis giddagassii ja servodatbálvalussii 100 diibmui. Nubbi dubmejuvvui bivdorihkolašvuođa dihte go gávdnui guovžža oaivi galbmaskábes, ja nubbi bivdorihkolašvuođa dihte ja vearjolága rihkkuma dihtii.

Fáddásánit
Ođđasat

På forsiden nå