OVDÁNANVEJOLAŠVUOHTA: Dál lea buorre vejolašvuohta fitnodatovdáneami hutkat Guovdageainnus maid, go dál gávdno veahkki. Sápmi Ealáhusgárdi lea dál doaimmas viimmat. Govas gurut ravddas: OD ovddas sátnejođiheaddjebarggus Joar Sten Olav Sárgon Hætta, Guovdageainnu sátnejođiheaddji Johan Vasara, Sámi Ealáhusgárddi jođiheaddji Marianne Balto, ja smávvafitnodateaiggát Isak Thomas Triumf. Govven: Nils Johan Vars

Sápmi Ealáhusgárdi ásahuvvui: – Smávvafitnodagaide stuora ávkin

Duorastaga lei Sápmi Ealáhusgárddis vuosttaš kántorbeaivi Guovdageainnus.

17:23 Skábmamánu 02. beaivi 2017
Ođastuvvon: 02.11.2017 - 17:53

Guovdageainnu suohkan leat juo muhtun jagiid bargan beassat Sápmi Ealáhusgárddi searvái.

Dál de viimmat čuvggodii dat beaivi maid.

 

Ealáhusaide ovdamunnin

Jođiheaddji, Marianne Balto, muitala ahte sii galget ovdánahttit Guovdageainnu fitnodagaid.

– Sihke veahkehit álggahit ođđa fitnodagaid, ja maid ovdánahttit fitnodagaid mat juo leat. Mun jáhkán Guovdageainnus leat hui olu vejolašvuođat, go jurddaša ahte leat birrasii 1100 ovttaskasolbmofitnodaga, lohká Balto.

 

Jáhkká ávkin

Smávvafitnodateaiggát, Isak Thomas Triumf, lea duhtavaš go lea ásahuvvon dákkár kantuvra Guovdageidnui.

– Jáhkán hui mávssolažžan šaddat go de lea mis, smávit fitnodagain, maid buorre vejolašvuohta ságastallat ja veahki oažžut fitnodaga ovdánahttit dahje nu, lohká son.

 

Gaskaboddosaččat lea Sápmi Ealáhusgárddis kántorsadji suohkanviesus, muhto sii leat buoret báikki ozus.

På forsiden nå