Gaskamearálaččat gávppaša juohke norgalaš 10 700 ruvnno ovddas juovlamánus. Čájáhusgovva, Govven: Váldoorganisašuvdna Virke

Gávppašit 56,3 milljárdda ruvnno ovddas dáid juovllaid

Váldoorganisašuvdna Virke merošta juohke norgalačča gávppašit sullii 10 700 ruvnno ovddas juovlamánus dán jagi.

13:27 Skábmamánu 06. beaivi 2017

Danin go juovlaruohta lea sotnabeaivvi dán jagi, de leat guokte unnit beaivvi gávppašit juovlamánus. Dasa lassin dáhpáhuvvá stuorra oassi gávppašeamis skábmamánus.

 

30 proseantta eanet juovlamánus

2016 logut čájehit ahte gálvojohtu juovlamánus lea 30 proseantta eanet go gaskamearálaš gálvojohtu reasta jagis. Duhkoras-, diibmo- ja gollegávppiid, ja girjegávppiid surggiin lea beali eanet gálvojohtu juovlamánus go gaskamearálaččat reasta jagis.

Gaskamearálaččat gávppašat mii 10 710 ruvnno ovddas juovlamánus. 4460 ruvnno geavahat dállodoallogávppiide ja 6250 ruvnno eará buvddaide. Mii geavahat sullii 20 proseantta eambbo dállodoallogávppiin juovlamánus go reasta jagis.

– Juovlamánnu lea mánnu goas beassá naffát veahá eambbo go dábálaččat, ja olusat illudit gitta juovlaborramuš joavdá buvddaide, muitala beaivválaš direktevrra Virkes Ingvill Størksen.

 

Olusat mátkkoštit juovllaid áigge

Olusat maiddái mátkkoštit olu juovllaid áigge. Virkes Reisepuls dieđuid vuođul de áigot 40 proseantta olbmuin juovlalupmui, mii lea lassáneapmi diimmá rájes. Sis, geat áigot lupmui, leat 16 proseantta dieđihan ahte leat olgoriikii mannamin.

Fáddásánit
Ođđasat

På forsiden nå