Jiekŋabázzi čájehuvvui olggobealde Oslo diggestobu Oslos vuossárgga ovdalgaskabeaivvi. Govven: Cornelius Poppe / NTB scanpix

Biras­gáhttejeaddjit čájehedje jiekŋa­bácci ovdal dálkkádat­diggeášši

Birasgáhttejeaddjit čájehedje vuossárgga jiekŋabácci olggobealde Oslo diggegotti symbolan dálkkádatriekteáššái mii álggahuvvo stáhta vuostá maŋŋebárgga.

09:24 Skábmamánu 14. beaivi 2017

Greenpeace ja Natur ja Ungdom čájehedje jiekŋabácci preassakonferánssas vuossárgga ovdalgaskabeaivvi.

Organisašuvnnat leat ovttas Besteforeldrenes klimaaksjonen áššáskuhttán stáhta go leat rahpan vejolašvuođa bohkat oljju Barentsábis.

Sii oaivvildit oljobohkamat rihkkot vuođđolága paragráfa 112.

 

– Menddo stuorra sisabahkken

Paragráfas celkojuvvo ahte juohkehaččas lea riekti birrasii mii sihkkarastá buori dearvvasvuođa, ja ahte resurssat galget hálddašuvvot nu ahte boahttevaš buolvva rievttit maiddái váldojit vuhtii.

Dat maid gáibida ahte stáhta čađaha hommáid paragráfa ektui.

– Mii oaivvildat ahte stáhta juohkin, go leat rahpan vejolašvuođa bohkat oljju, ii leat gustojeaddji danin go dát ovddasta menddo stuorra sisabahkkema boahttevaš buolvva dálkkádahkii ja danin go dálkkádatváikkuhusat eai leat čielggaduvvon, muitalii jođiheaddji Greenpeace Norggas Truls Gulowsen, NTBii sotnabeaivvi.

 

Ráđđehus hilgu čuoččuhusaid

Ráđđehusa advokáhtta hilgu dáid čuoččuhusaid.

– Vuođđoláhka ii gieldde mearrádusaid mat sáhttet dagahit negatiiva váikkuhusaid dálkkádahkii, muhto geatnegahttá gieldda čađahit doaimmaid mat veahkehit eastadit vahátlaš váikkuhusaid, ja dan lea stáhta dahkan, ákkástallá Sejersted loahppačállosis.

Ášši Oslo diggegottis bistá gitta skábmamánu 22. dahje 23. rádjái.

(©NTB)

Fáddásánit
Ođđasat

På forsiden nå