– JUS SÁHTTÁ EASTADIT: Charlotte Eira lohká ahte jus boahkuin sáhttá eastadit borasdávdda, de ii oainne boasttuvuođaid váldit boahku. Govven: Sárá Máret Rávdná Oskal

– Soaitá leat heahpat

Dearvvašvuođadivššárat lohkaba unnán nuorra nieiddaid Guovdageainnus váldán HPV-boahku. Nuorra nieida, guhte ieš lea váldán dán vaksiinna, jáhkká tabuaid sáhttit leat duogážin dasa.

 

15:26 Miessemánu 12. beaivi 2017

Charlotte Eira (25) lea Ruoŧa beale Sámis eret, ja doppe lei olu diehtojuohkin boahku birra, muhto ii šaddan goasse váldit boahku. 

Go fárrii Guovdageidnui 2010:s, ii gullan šat dan birra, ovdal go bođii SMS-muittuhus Álbmotdearvvašvuođa instituhtas. 

Dál sus okta olmmái ávžžuhii boahkuhuvvot, ja Charlotte mearridii váldit boahku.

– Jus sáhttá eastadit dávddaid, de manne ii, lea juobe geahččalan ge. Borasdávda ii leat mihkke leaikkaid, jus šaddá mihkke ja ii leat váldán boahku, šaddá álo jurddašit manne ii váldán, lohká Charlotte.

 

Jáhkká leat tabun

Son ii leat gullan nu olu humu boahku birra. 

Son árvvoštallá ahte soaitá heahpat go njoammu seksuálalaš oktavuođain, muhto jáhkká ahte lea ávki hupmat dan birra, vai ii leat tabu.

– Sáhttá maid leahkit dalle go spiidneinfluensa leavai, olbmot válde boahkuid eai ge diehtán mii dat lei. Das ledje olu liigeváikkuhusat. Muhto dán boahku leat dutkan olu, dál gullen ahte álget bártniide maid fállat boahku. Dán leat dutkan olu, ja áin ávžžuhit boahkuhuvvot. Jáhkán ahte jus livččii várálaš, de ii livčče nuvttá, lohká Charlotte.

 

Unnán nuorra nieiddat boahtán


HPV-BOAHKKU: Skábmamánu 1. beaivvi rájes leaba Berit Inger Anne Buljo ja Inga Karen Anne Sara boahkuhan HPV-boahkuin. Eaba leat beassan boahkuhit nu olu go leigga jáhkkán, go vásiheaba ahte lea unnán diehtu boahku birra. Govven: Sárá Máret Rávdná Oskal

HPV-vaksiidna fállo nuvttá buot nieiddaide geat leat šaddan 1991:s ja ovdal.

Dat lea oassi Álbmotdearvvašvuođa instituhta prográmmas, eastadit borasdávdda mánágoahtečoddagis.

– Eai leat boahtán nu oallugat boahku oažžut go leimmet doivon ja vuordán, lohká dearvvašvuođadivššár ja jortamovra Inga Karen Anne Sara.

– Lea oalle unna proseanttaš nuorra nieiddain geat leat boahtán, lasiha dearvvašvuođadivššár Berit Inger Anne Buljo.

 

Leamaš diehtojuohkin

Vaksiidna eastada HPV-infekšuvnnaid, mii lea mii dagaha mánágoahtečottaborasdávdda. HPV-infekšuvdna sáhttá rievdat seallarievdamii, mii fas sáhttá rievdat borasdávdan.

Dearvvašvuođadivššárat lohkaba ahte sii geat bohtet boahkuhuvvot, dihtet ja leat lohkan boahku birra, muhto muđui eai jearat nuorat sudnos dan birra.

– Mis lea leamaš diehtojuohkin dan birra, ja Álbmotdearvvašvuođa instituhtas lea leamaš diehtojuohkin dan birra. Dattetge leat unnán leamaš váldime boahku, go jurddaša mis leat olu nuorat min suohkanis. Orru leame nu ahte olusat gullet olbmáin boahku birra, ja orru unnán diehtu boahku birra, lohká Berit Inger Anne Buljo.

Soai árvvoštallaba ahte nuorat soitet eará sajiin leamaš váldime boahku, jus mat studerejit eará báikkis. Boahku sáhttá váldit doppe gos orru.

– Lea váttis diehtit manne eai leat leamaš nu olusat váldime boahku, lohkaba soai.

 

Humant Papillomavirus (HPV)

– Humant papillomavirus (HPV) lea virusinfekšuvdna mas gávdnojit badjel 100 iešguđetlágan šlája. Muhtun šlájat eai leat várálaččat, earát fas sáhttet dagahit seallarievdademiid ja borasdávdda.

– HPV-virus njoammu seksualálaš oktavuođain.

– Norggas gávdnojit guovttelágan HPV-boahku. Goappaš boahkut várjalit HPV 16 ja HPV 18 vuostá. Dat guokte šlája leat mat dávjjimusat (70 proseantta) dagahit borasdávdda mánágoahtečoddagis.

– Buot nieiddat mat leat šaddan 1991:s ja ovdal ožžot nuvttá HPV-boahku.

– 2009 rájes leat buot 7. luohká nieiddat ožžon fálaldaga boahkuhuvvot.

– Mihttun boahkuhanprográmmain lea oažžut mánágoahtečottaborasdávdaloguid njiedjat Norggas.

– HPV-infekšuvdna lea dávjjimusat nuorra olbmuin. Danne fállo boahkku nuoraide.

– Dábáleamos liigeváikkuhus lea ahte árástuvvo, ruvssoda ja bohtana dakko gokko boahkku lea biddjon. Muhtumat ožžot oaivebákčasa, šaddet váibbasin ja deahkit bávččagit. Lea oalle dábálaš febera oažžut. Sáhttá maid šaddat bávččas lađđasiin, sakŋida, ihtaluvvá, váibmogákkahat, njárbes čoavji dahje čoavji bávččas.

– Ii leat goasse duođaštuvvon ahte HPV-boahkku lea dagahan duođalaš buozalmasvuođa.

– Sáhttá balddihan

Lea leamaš sáhka ahte HPV-boahkus leat várálaš liigeváikkuhusat. Danmárkkus leat jáhkkán ahte HPV-boahkku dagaha POTS-dávdda (Postural Ortostatisk Takykardi Syndrom).

Eurohpá dálkkasdoaimmahat lea guorahallan ášši, muhto eai gávdnan makkárge duođaštusa ahte lei boahkku mii dagahii POTS-dávdda. Dan čállá Álbmotdearvvašvuođa instituhtta iežaset neahttasiiddus.

– Ii Álbmotdearvvašvuođa instituhtta livčče ávžžuhan váldit dan jus livččii duođaštuvvon ahte lea várálaš. Ii ábut juohke diŋgii jáhkkit maid neahtas lohká, muhto dieđusge lea iežas árvvoštallama duohken. Dat sáhttá balddihan nuoraid váldimis boahku, lohká Inga Karen Anne Sara.

Stáhta ávžžuha buot nuorra nieiddaid váldit boahku, go oidnet ahte lea olu mánágoahtečottaborasdávda.

Juohkehaš galgá váldit golbma boahku, ja dearvvašvuođadivššárat čilgeba ahte dat mákset stádii lagabui 4000 ruvnno.

– Eai livčče duššiid dihte bidjan ná divrras eastadandoaimmaid johtui jus das ii livčče ávki, lohká Inga Karen Anne Sara.

 

Váttis fuomášit

HPV-virus njoammu seksuálalaš ovttasteami oktavuođas. Dearvvašvuođadivššárat čilgeba ahte eanas olbmuin lea HPV-infekšuvdna okte eallinagis, muhto muhtumin rumaš čorge dan ieš eret.

Eará háviid šaddá seallarievdan, ja muhtun háviid rievdá borasdávdan.

– Mánágoahtečottaborasdávdda ii leat álki fuomášit, ja dat sáhttá leavvan guhkás ovdal go mearkkat álget boahtit. Dalle sáhttá leahkit beare maŋŋit, čilgeba soai.

– Dá lea investeren iežas dearvvašvuhtii, mii ávžžuhit váldit oktavuođa. Sáhttá vaikko SMS sáddet, ja mii šiehttat áiggi, lohkaba soai.

 

Evttoha fáddáeahkeda

– Midjiide, geat leat boarráseappot, ii soaitte nu issoras váldit oktavuođa dearvvašvuođaguovddážiin. Jáhkán nuorabuidda lea veahá vearrát. Jáhkán livččii buorre jurdda lágidit fáddáeahkeda, muhtun eahkeda ovdamearkka dihte, lohká Charlotte Eira.

– Buorre jurdda gal livččii, muhto nubbi lea ahte bohtet go. Dávjá go mii lágidit fáddáeahkediid, de eai boađe nuorat. Šaddá nu ahte čohkkát ja vuordit, lea váttis olahit nuoraid, lohkaba dearvvašvuođadivššárat evttohusa birra.

Avvir.no sávva rabas ja áššálaš digaštallama. Mii doalahit rievtti sihkkut sátnevuoruid.
Fáddásánit
Ođđasat

På forsiden nå

Guovdageaidnu vuoittáhalai ruovttušiljus.

Almmuhuvvon odne, dii. 11:27 Miessemánu 28. beaivi 2017

Deanu heaibunsearvvi Synne M. Haagensen šattai Davviriikkaid measttirin ikte.

Almmuhuvvon odne, dii. 10:44 Miessemánu 28. beaivi 2017

Loga maid Finnmárkku politiijat leat mannan ija šaddan bargat.

Almmuhuvvon odne, dii. 09:46 Miessemánu 28. beaivi 2017

Guokte olbmo beasaiga dearvan olggos.

Almmuhuvvon odne, dii. 10:21 Miessemánu 28. beaivi 2017

Sihke Nordlysas ja Guovdageainnus lea čiekčan odne.

Almmuhuvvon ikte, dii. 11:54 Miessemánu 27. beaivi 2017

Stáhtaministtar boahtá Romssa gávpogii borgemánus čuovvut sihkkelgilvvu.

Almmuhuvvon ikte, dii. 11:21 Miessemánu 27. beaivi 2017

Ráissa jumešnieiddat ja logi eará dovddus olbmo galget orrut Finnsvika dálus.

Almmuhuvvon ikte, dii. 10:23 Miessemánu 27. beaivi 2017

Massii vuodjingoartta ovdal go goarta lei dahkkon ge.

Almmuhuvvon ikte, dii. 09:33 Miessemánu 27. beaivi 2017

NBR jođiheaddji evttoha ahte boazodoalli galgá sáhttit duššo riŋgestit Fylkkamánnái jus olu goaskimat leat ealu alde, ja lohkat ahte ferte báhčit. – Otná njuolggádusaid mielde ii leat dat nu álki, lohká Finnmárkku fylkkamánni Biras- ja dálkkádatossodaga sekšuvdnajođiheaddji

15:29 Miessemánu 26. beaivi 2017

Boazoeaiggáda Aslak Mathis Turi mielas ii doaimma dálá boraspirehálddašeapmi, ja sus ii leat makkárge vuohki várjalit iežas bohccuid meahcceelliid vuostá. Son jáhkká buoremus livččii jus boazoeaiggádat beasaše hálddašit boraspiriid.

10:00 Miessemánu 26. beaivi 2017

Riddu Riđđu festiválas ii leat dušše musihkka guovddážis. Sii loktejit máŋggabealatvuođa álgoálbmotmáilmmis, ja digaštallet hástalusaid mat leat Sámis ja eará álgoálbmogiin.

11:22 Miessemánu 26. beaivi 2017

Boahtte vahkus deaivvada Sámediggi giellaguovddážiiguin bargobádjái digaštallat mo galget seailluhit sámegiella ja hutkát mo nagodit olahit mihttu oažžut 30 000 sámegielhálli.

10:56 Miessemánu 26. beaivi 2017

Norgga Sámiid Riikkasearvi lea mearridan ovddidit duohtavuođa- ja seanadankommišuvnna hoahppoáššin Sámedikki dievasčoahkkimii boahtte vahkus.

10:28 Miessemánu 26. beaivi 2017

Goas jiekŋa manná, lea giđa stuorámus dáhpáhus Deanuleagis, dat mearkkaša ahte luossabidvu láhkona. Olbmot leat vuorddašeame goas de sáhttet čoahkkanit Vuolle-Geavgŋái geahččat makkár fámut leat jođus go jiekŋa mánná.

12:04 Miessemánu 25. beaivi 2017