SÁMEDIKKEVÁLGGAT: Ruoŧa Sámediggái leat ovcci bellodaga ceggen listtuid. Preassagovva: Thomas Sarri/Sameradion & SVT Sápmi

Njuolggo­sátta Ruoŧa sámedigge­válggain

Sotnabeaivvi lea Ruoŧas sámediggeválga. Sameradion čuovvu válgga njuolggosáddagiin.

17:38 Miessemánu 18. beaivi 2017
Ođastuvvon: 19.05.2017 - 09:00

Ruoŧa Sámedikki jienastuslohku lassána ovdal juohke válgga. Dál leat fargga 9 000 jienastuslogus. Sameradion lea vuohttán eanet beroštumi sámi politihkkii, ja leat bidjan olu návccaid dán jagáš válgii.

– Sameradionii ja SVT Sápmái lea liikká dehálaš čuovvut sámediggeválggaid, go Ruoŧa mediaide lea čuovvut riikkabeaivvi válggaid. Lea sámi demokratiijas sáhka, lohká Sameradion ja SVT Sámi hoavda Ole Isak Mienna.

 

Njuolggosátta debáhtas

Sameradion ja SVT Sápmi sáddejit njuolga Lövångeris, Västerbottenis gos lea válgadebáhtta masa buot ovcci bellodaga servet. Fáddán debáhtas lea sámi iešmearrideapmi, ja sámiid psyhkalaš dearvvašvuohta. Debáhtta lea bearjadaga, guokte beaivvi ovdal válgabeaivvi.

Reportárat čuvvot válgabeaivvi guđa iešguđet válgalanjain. Badje-Sohpparis, Gironis, Árviesjávrries, Ubmis, Staares ja Stockholmmas čuvvot reportárat ovdáneami.

Válgaboađus čielgá disdaga, miessemánu 30. beaivvi. Sameradion ja SVT Sápmi sáddejit njuolga Lulejus gos bellodatnjunnošat leat. Doppe lea maid guoimmuheapmi, sámi musihkka ja stand-up komediija.

På forsiden nå